क्रिस्टियानो रोनाल्डोले सामाजिक सञ्जालमा नयाँ वर्ष २०२२ को पूर्वसन्ध्यामा शुभकामना दिँदै परिवारसहितको एउटा फोटो पोस्ट गरे ।
जहाँ पोर्चुगिज स्टारले २०२१ को सार–संक्षेप वर्णन गर्न भ्याए तर वर्तमान क्लब म्यानचेस्टर युनाइटेडको भने खुलेरै आलोचना गरे भने आफ्ना उपलब्धि खुलेरै सुनाए ।
‘२०२१ आयो र सकियो,’ उनले लेखेका छन्, ‘यो सहजभन्दा टाढा रहेको वर्ष बन्यो मेरा लागि । सबै प्रतियोगिता गरी ४७ गोल गरेँ । दुई भिन्न क्लब र पाँच फरक प्रशिक्षक । राष्ट्रिय टिमबाट एउटा युरो फाइनल चरण खेलेँ र विश्वकप छनोट अझ बाँकी नै छन् ।’
‘युभेन्टसबाट इटालियन कप र इटालियन सुपर कप जित्दा गर्व महसुस गरेँ र सिरी ‘ए’मा शीर्ष गोलकर्ता बनेँ,’ उनले लेखेका छन्, ‘सबैभन्दा महत्त्वपूर्ण कुरा पोर्चुगलका लागि म युरो कपै सर्वाधिक गोलकर्ता बनेँ । र, पक्कै पनि, ओल्ड ट्राफोर्ड पुनरागमन मेरो करिअरकै सबैभन्दा महत्त्वपूर्ण बन्यो ।’
तथापि, उनले युनाइटेडको पछिल्लो प्रदर्शनबाट आफू खुसी नभएको बताउँदै क्लबको आलोचना गरे ।
‘तर म अहिले युनाइटेडले हासिल गरिरहेको उपलब्धिबाट खुसी छैन’, उनले लेखेका छन्, ‘मलाई थाहा छ हामी कोही पनि खुसी छैनौँ । हामीलाई थाहा छ हामीले अझै कठिन कार्य गर्नु छ, उत्तम खेल्नु छ र अहिले दिएको भन्दा उत्कृष्ट दिनु छ ।’
युनाइटेड च्याम्पियन्स लिगको नकआउट चरणमा पुगेको छ । तर घरेलु लिगमा भने ऊ शीर्ष चारका लागि सङ्घर्षरत छ ।
