विराटनगर । धान रोपाइँको मुख्य समय मानिने असार महिना अन्त्यतिर पुग्दा पनि कोशी प्रदेशमा धान रोपाइँले अपेक्षित गति लिन सकेको छैन। हालसम्म प्रदेशको कुल धान खेतीयोग्य क्षेत्रफलमध्ये ५४.८६ प्रतिशत अर्थात् करिब ५५ प्रतिशत क्षेत्रमा मात्रै धान रोपाइँ सम्पन्न भएको छ।
कोशी प्रदेश कृषि विकास निर्देशनालयका अनुसार प्रदेशभर धान खेती हुने कुल २ लाख ७६ हजार ३८६.७२ हेक्टर क्षेत्रफलमध्ये १ लाख ५१ हजार ६१९.३० हेक्टर क्षेत्रमा धान रोपाइँ सम्पन्न भएको छ।
जिल्लागत रूपमा सबैभन्दा बढी भोजपुरमा ७५ प्रतिशत धान रोपाइँ भएको छ भने धनकुटामा सबैभन्दा कम २८ प्रतिशत मात्रै रोपाइँ भएको निर्देशनालयका सूचना अधिकारी तथा वरिष्ठ बागवानी विकास अधिकृत टोनी बर्देवाले जानकारी दिए।
उनका अनुसार खोटाङमा ७१.३६ प्रतिशत, पाँचथरमा ६७ प्रतिशत, इलाममा ६६ प्रतिशत, झापामा ६१.८० प्रतिशत, सोलुखुम्बुमा ५७.५६ प्रतिशत, उदयपुरमा ५५ प्रतिशत, सुनसरीमा ५२ प्रतिशत, तेह्रथुममा ५१.५८ प्रतिशत, ताप्लेजुङमा ४९ प्रतिशत, ओखलढुंगामा ४७.४६ प्रतिशत, मोरङमा ४६ प्रतिशत र संखुवासभामा ३६ प्रतिशत क्षेत्रमा धान रोपाइँ सम्पन्न भएको छ।
भौगोलिक क्षेत्रअनुसार मध्यपहाडमा ६१.०९ प्रतिशत रोपाइँ भइसकेको छ भने तराईमा ५३.६६ प्रतिशत र उच्च पहाडी क्षेत्रमा ४२.५३ प्रतिशत मात्रै रोपाइँ सम्पन्न भएको निर्देशनालयको तथ्यांकमा उल्लेख छ।
बर्देवाका अनुसार पछिल्लो समय केही जिल्लामा पर्याप्त वर्षा भएपछि धान रोपाइँले गति लिन थालेको छ। तर, केही स्थानमा अझै पनि पानीको अभाव र प्रतिकूल मौसमका कारण रोपाइँ अपेक्षित गतिमा अघि बढ्न सकेको छैन।
प्रदेशको तराई क्षेत्रमा रहेको १ लाख ९३ हजार २८५.१८ हेक्टर धान खेतीयोग्य जमिनमध्ये १ लाख ३ हजार ७१४.२८ हेक्टरमा रोपाइँ सम्पन्न भएको छ। त्यसैगरी मध्यपहाडी क्षेत्रको ६७ हजार ७१७.५८ हेक्टरमध्ये ४१ हजार ३६६.०७ हेक्टर तथा उच्च पहाडी क्षेत्रको १५ हजार ३८३.९६ हेक्टरमध्ये ६ हजार ५३८.९६ हेक्टरमा धान रोपाइँ सम्पन्न भएको कृषि विकास निर्देशनालयले जनाएको छ।
