काठमाडौं – त्रिभुवन विश्वविद्यालयले आफ्नो हाताभित्र रहेको अतिक्रमित जग्गा खाली गराउन ३५ दिनको अल्टिमेटम दिएको छ। यसअन्तर्गत कीर्तिपुरस्थित क्रिकेट मैदान पनि परेको छ।त्रिविले वैशाख ४ गते सार्वजनिक सूचना जारी गर्दै जग्गा प्रयोग गरिरहेका सबै निकायलाई छुट्टाछुट्टै पत्र पठाएर तोकिएको समयभित्र खाली गर्न निर्देशन दिएको हो। सोही क्रममा नेपाल क्रिकेट संघ (क्यान) लाई पनि पत्र पठाइएको जनाएको छ।
त्रिवि प्रशासनका अनुसार क्यानसँगको सम्झौता यही वैशाख मसान्तमा सकिँदैछ र यसपटक सम्झौता नवीकरण गर्ने पक्षमा विश्वविद्यालय नरहेको संकेत गरिएको छ। विश्वविद्यालयका पदाधिकारीहरूले ठूला खेलका कारण अध्ययन–अनुसन्धानमा असर परेको भन्दै मैदान फिर्ता लिनुपर्ने आवश्यकता औंल्याएका छन्।
सामान्य प्रशासन महाशाखाका प्रमुख राजबहादुर राईका अनुसार १८ वटा संघ–संस्थालाई ३५ दिनभित्र जग्गा खाली गर्न पत्राचार गरिएको छ। यो निर्णय त्रिविको जग्गा खोजबिन समितिको प्रतिवेदनका आधारमा गरिएको हो।
यता क्यानका प्रवक्ता छुम्बी लामाले भने आफूहरूले पत्र नपाएको बताएका छन्। क्यानको बोर्ड बैठकले भने सम्झौता नवीकरणका लागि पहल गर्ने निर्णय गरिसकेको छ।
सरकारले यसअघि त्रिवि मैदानलाई अन्तर्राष्ट्रियस्तरको क्रिकेट रंगशाला बनाउने गुरुयोजना स्वीकृत गरिसकेको भए पनि अहिले मैदान खाली गराउने निर्णयपछि निर्माण प्रक्रिया अन्योलमा परेको छ।
त्रिविको प्रतिवेदनअनुसार कीर्तिपुर क्षेत्रमा मात्रै करिब १ हजार रोपनी जग्गा अतिक्रमण भएको उल्लेख गरिएको छ। यसमा संलग्नविरुद्ध कारबाहीका लागि अख्तियार दुरुपयोग अनुसन्धान आयोग, नेपाल प्रहरी को सीआईबी तथा जिल्ला प्रशासन कार्यालयलाई सिफारिस गरिएको छ।
