काठमाडौं । साताको दोस्रो कारोबार दिन मंगलबार सेयर बजारमा उत्साहजनक वृद्धि देखिएको छ। नेपाल स्टक एक्सचेञ्ज (नेप्से) परिसूचक २३.८३ अंकले बढ्दै करिब २९६० अंकको नजिक पुगेको छ, जुन पछिल्ला करिब ८ महिनायताकै उच्च स्तर हो।
परिसूचकमा हरियाली देखिए पनि कारोबार रकम भने अघिल्लो दिनको तुलनामा केही घटेको छ। सोमबार १५ अर्ब ७८ करोड रुपैयाँको कारोबार भएकोमा मंगलबार १४ अर्ब ८३ करोड रुपैयाँमा सीमित रह्यो।
आजको कारोबारमा १३६ कम्पनीका सेयर मूल्य बढेका छन् भने ११७ कम्पनीका घटेका छन्। ११ कम्पनीको मूल्य स्थिर रहेको छ।
समूहगत प्रदर्शनतर्फ व्यापार समूह सबैभन्दा आकर्षक देखिएको छ। यस समूहअन्तर्गत विशाल बजार कम्पनी को सेयर मूल्य झन्डै १० प्रतिशत (९.९१%) ले बढेसँगै समग्र व्यापार समूह ९.१२ प्रतिशतले उकालो लागेको हो।
त्यसैगरी बैंकिङ, विकास बैंक, फाइनान्स, हाइड्रोपावर, लगानी तथा उत्पादन–प्रशोधन समूहमा पनि सकारात्मक वृद्धि देखिएको छ।
यद्यपि होटल तथा पर्यटन क्षेत्र, जीवन बीमा, माइक्रोफाइनान्स र निर्जीवन बीमा समूहमा गिरावट देखिँदा बजारले मिश्रित संकेत दिएको छ।
आज ६ कम्पनीको सेयर मूल्यमा सर्किट लाग्ने स्तरको वृद्धि देखिएको छ। ती कम्पनीमा रिलायन्स स्पिनिङ मिल्स, सालपा विकास बैंक, सोलु हाइड्रोपावर, हिमालयन पावर पार्टनर, भुजुङ हाइड्रोपावर र होटल फरेस्ट इन रहेका छन्।
अर्कोतर्फ फर्स्ट माइक्रोफाइनान्स को सेयर मूल्य सबैभन्दा धेरै ६.५६ प्रतिशतले घटेको छ। त्यसपछि मनकामना इन्जिनियरिङ हाइड्रोपावर र मेरो माइक्रोफाइनान्स मा पनि गिरावट देखिएको छ।
कारोबार रकमका आधारमा राधि विद्युत्, अपी पावर, एचआईडीसीएल, ङादी ग्रुप पावर र शिवम् सिमेन्ट अग्रस्थानमा रहेका छन्।
