नेपाली काङ्ग्रेसका नवनिर्वाचित महामन्त्री विश्वप्रकाश शर्माले देश उमेरले नभइ एजेन्डाले चल्ने बताएका छन् । पोखरामा ४६औँ राष्ट्रिय एकता तथा मेलमिलाप दिवसका क्रममा आयोजित कार्यक्रममा सम्बोधन गर्दै महामन्त्री शर्माले यस्तो बताएका हुन् ।
विश्वप्रकाश शर्माले मेलमिलाप दिवस सरकारको अलोकतान्त्रिक कदमविरुद्ध सबै शक्तिलाई एक ठाउँमा उभ्याउनका लागि केन्द्रित हुने बताउँदै नेपालका कम्युनिस्टहरुले हिंसाको प्रयोग सही समयमा गर्न नसकेको जिकिर गरे । हिंसा र क्रान्ति गरेको केही समयपछि कम्युनिस्टका नेताहरूले पनि बीपी कोइरालाको बयान गर्न थालेको उनले बताए ।
काङ्ग्रेसको अब हुने नीति अधिवेशनमा कोही पनि एक पटकभन्दा राष्ट्रपति बन्न नपाउने, दुई पटकभन्दा प्रधानमन्त्री बन्न नपाउने, तीन पटकभन्दा बढी मन्त्री र चार पटकभन्दा बढी सांसद बन्न नपाइने प्रस्ताव लैजाने सुनाए ।
शर्माले उमेरहदको व्यवस्था आफूले कहिले नउठाएको बताए । शर्माले भने, ‘उमरेले हैन, एजेन्डाले देश चल्छ, एजेन्डा पाकाको पनि हुनसक्छ, एजेन्डा युवाको पनि हुन सक्छ ।’
