विराटनगर । कोशी प्रदेशको सामुदायिक विद्यालयमा अध्ययनरत विद्यार्थीहरुले यसपटक समयमै किताब पाउने भएका छन् ।
नयाँ शैक्षिक सत्र सुरु हुुनु अगावै विद्यालयमा पुस्तक पुग्न थालेपछि विद्यार्थीहरुले समयमै पुस्तक पाउने भएका हुन् । विद्यार्थीहरुले विगतमा जस्तो किताब नै नहेरी परीक्षा दिनुपर्ने बाध्यता यसपटक नहुने भएको हो । विगतका वर्षमा शैक्षिक सत्र सकिने बेलासम्म विद्यार्थीहरुले पाठ्यपुस्तक पाउँदैनथे । पाठ्यपुस्तकको मुखै नहेरी परीक्षा दिनुपर्ने बाध्यता विद्यार्थीहरुको थियो । तर, यसपटक त्यस्तो नहुने भएको छ । यसपटक वैशाख २ गतेदेखि सुरु हुन लागेको शैक्षिक सत्रको सुरुवातमै विद्यार्थीका हातहातमा पाठ्यपुस्तक पुग्ने भएका छन् । विद्यार्थीले यसपटक हेरेर मात्र होईन, किताब पढेरै आफ्नो वार्षिक परीक्षा दिन पाउने भएका छन् । श्रोत, साधन र जनशक्ति अभावको समस्यालाई सरकारले समाधान गरेपछि यसपटक विद्यालयहरुमा समय अगावै पुस्तक पुग्ने जनक शिक्षा सामाग्री केन्द्र कोशी प्रदेश कार्यालयले जनाएको छ । नजिकिँदै गरेको २०८१ सालको शैक्षिक सत्रलाई दृष्टिगत गर्दै यसपटक चैत्र १३ गतेदेखि नै पाठ्यपुस्तकको बिक्री वितरण सुरु भईसकेको जनक जनक शिक्षा सामाग्री केन्द्र कोशी प्रदेशका प्रमुख भुपराज थापाले बताए ।
कोशी प्रदेशको पहाडी जिल्लाहरुमा यसअघि शैक्षिक सत्र सुरु भएको महिना दिनपछि मात्र पाठ्यपुस्तक पुग्थ्यो । छपाई कम हुँदा र समयमै छपाई नहुँदा जनक शिक्षासँग पनि माग बमोजिमकोे पर्याप्त पुस्तक आईपुग्दैनथ्यो । तर, यसपटक नयाँ शैक्षिक सत्र आउनुभन्दा ३ साताअघि नै कोशी प्रदेशको पूर्वी तराई र विकट पहाडी जिल्लाहरुमा पाठ्यपुस्तक पुगिसकेको छ । हालसम्म कुल १६ लाखमध्ये साढे ७ लाख पुस्तक बिक्री वितरण भईसकेको जनक शिक्षा सामाग्री केन्द्रले जनाएको छ । चैत्र मसान्तसम्म जिल्लाका सबै सामुदायिक विद्यालयहरुमा माग बमोजिमको पाठ्यपुस्तक पुगिसक्ने केन्द्रको दाबी छ । पुस्तक व्यावसायीहरुले समेत विगतका वर्षहरुको तुलनामा यसपटक पुस्तक पाउन निकै सहज रहेको प्रतिक्रिया दिएका छन् ।
‘पहिलापटक हो समयमै माग अनुसारको किताब पाएको । यसअघिसम्म त जति धाएपनि पाईदैनथ्यो’, धनकुटाका पुस्तक व्यावसायी सोमराज पौडेलले भने, ‘हामीले समयमै पुस्तक पाईसक्यौं । अब विद्यालयमा पनि समयमै पुग्छ ।’
कोशी प्रदेशमा कुल १२२ वटा पुस्तक व्यावसायीहरु जनक शिक्षा सामाग्री केन्द्रमा सुचीकृत छन् । व्यावसायीले पुस्तक लगेर गृह जिल्लाका विद्यालयहरुलाई बिक्री गर्छन् । विद्यालयले भने पुस्तक खरिद गरी कक्षा १ देखि १० सम्मका विद्यार्थीलाई निःशूल्क वितरण गर्छ । हालसम्म कोशी प्रदेशको १४ मध्ये १२ वटा जिल्लामा पुस्तक पुगिसकेको छ । विराटनगरको तुलनामा काठमाण्डौंको ढुवानी खर्च सस्तो पर्ने भएकाले सोलुखुम्बु र ओखलढुङ्गामा भने प्रत्येक वर्ष केन्द्रबाटै पुस्तक पठाउने गरिएको छ ।
