विराटनगर । नेपाली कांग्रेसले राष्ट्रियसभा सदस्यको उम्मेदवार टुंगो लगाएको छ ।
नेपाली कांग्रेस पार्टी कार्यालयका मुख्य सचिव कृष्णप्रसाद पौडेलका अनुसार आइतबार सर्वसम्मत उम्मेदवार तय भएकाे हो ।
पार्टी केन्द्रीय कार्यालयमा बसेको संसदीय बोर्डको बैठकले उम्मेदवारको टुंगो लगाएको हो ।
कांग्रेसले कोसी प्रदेशबाट कृष्णप्रसाद सिटौलालाई राष्ट्रियसभाको उम्मेदवार बनाउने निर्णय गरेको छ ।
सिटौला सभापति शेरबहादुर देउवाद्वारा हस्ताक्षर गरिएको टिकट लिएर काठमाडौंबाट हिँडिसकेका छन् ।
नेपाली कांग्रेसका पूर्वमहामन्त्री रहेका सिटौला गत प्रतिनिधिसभा निर्वाचनमा झापा ३ बाट पराजित भएका थिए ।
सत्तारूढ गठबन्धनका उम्मेदवार उनलाई राप्रपाका अध्यक्ष राजेन्द्र लिङ्देनले एमालेको सहयोग लिएर पराजित गरेका थिए ।
सिटौला त्यसअघि २०७४ को निर्वाचनमा पनि लिङ्देनसँग नै पराजित भएका थिए ।
यसअघि राष्ट्रपतिको पनि आकांक्षी रहेका सिटौलाले राष्ट्रपति रामचन्द्र पौडेल भएपछि राष्ट्रियसभामा जान लागेका हुन् ।
चुनाब हारेकालाई लैजान नहुने मत कांग्रेसभित्र भए पनि कांग्रेसको गत महाधिवेशनदेखि सभापति देउवालाई सहयोग गर्दै आएका सिटौलालाई कसैले रोक्न सकेन ।
नेपालको शान्ति प्रक्रियामा महत्त्वपूर्ण योगदान गरेका सिटौला पूर्वगृहमन्त्री पनि हुन् ।
उनले २०७२ को संविधान निर्माणमा पनि नेतृत्वदायी भूमिका खेलेका थिए ।
सत्तारूढ गठबन्धनको भागबण्डाअनुसार कोसीमा अन्यतर्फ कांग्रेसले र महिलातर्फ माओवादीले उम्मेदवार उठाउने तय भएको थियो ।
माओवादीले महिलामा ओखलढुंगाकी चम्पादेवि कार्कीलाई उम्मेदवार बनाउने निर्णय गरिसकेको छ ।
कोसीमा कुन दलको मतभार कति ?
कोसी प्रदेशमा राष्ट्रियसभाका लागि स्थानीय तहका दुई सय ७४ र प्रदेशका ९३ सांसद गरी जम्मा तीन सय ६७ मतदाता छन् ।
प्रदेशमा प्रदेशसभाका ९३ सांसदमा एमालेका ४०, काङ्ग्रेसका २९, माओवादी केन्द्रका १३, राप्रपाको ६, एकीकृत समाजवादीको चार र जसपाको एक जना छन् ।
निर्वाचनमा प्रदेशसभा सदस्यको मतभार ५३ हुन्छ ।
जसअनुसार सांसदहरूतर्फ एमालेको दुई हजार एक सय २०, काङ्ग्रेसको एक हजार पाँच सय ३७, माओवादीको ६ सय ८९, राप्रपाको तीन सय १८, एकीकृत समाजवादीको दुई सय १२ र जसपाको ५३ मतभार छ ।
गठबन्धन कायम रहँदा गठबन्धनको पक्षमा पाँच हजार चार सय ८३ मतभार हुनेछ ।
जुन एमालेको भन्दा एक हजार दुई सय ६४ ले बढी हो ।
यस्तै, स्थानीय तहका प्रमुख तथा उपप्रमुखको मतभार १९ हुन्छ ।
स्थानीय तहका प्रमुख र उपप्रमुखमा प्रदेशमा रहेका एक सय ३७ पालिकाका दुई ७४ मध्ये एमालेका एक सय १०, काङ्ग्रेसका एक सय १५, माओवादीका ३१, राप्रपाका चार, एकीकृत समाजवादीका सात, जसपाका चार र स्वतन्त्र तीन जना छन् ।
पालिकामा एमालेको दुई हजार ९०, काङ्ग्रेसको दुई हजार एक सय ८५, माओवादीको पाँच सय ८९, राप्रपाको ७६, एकीकृत समाजवादीको एक सय ३३, जसपाको ७६ र स्वतन्त्रको ५७ मतभार छ ।
