दाँत तथा मुख सफा गर्ने तरिका

सौन्दर्यको लागि मात्र नभई दाँत स्वास्थ्यका लागि पनि उत्तिकै महत्वपूर्ण मानिन्छ ।

दाँतले खानेकुरा चपाएर खाइन्छ । दाँत सफा, बलियो भयो भने खाएको खानेकुरा राम्ररी चपाउन सकिन्छ र यसलाई सजिलै पेटले पचाउन पनि सक्छ ।

दाँत र मुखलाई सफा तथा स्वच्छ राख्यो भने स्वास्थ्य पनि राम्रो हुन्छ । खाएको खानेकुरा दाँतको वरिपरि टासिन्छ, दाँत राम्रोसँग सफा गरिएन भने दिनदिनै खानेकुरा टासिँदै जान्छ ।

दाँतमा जम्मा भएको खानेकुरा मुखमा भएका हजारौँ किटाणुका कारण एसिड बन्छ । त्यही एसिडले हाम्रो दाँतलाई बिगार्न थाल्छ ।

जसकारण दाँतमा किरा लाग्ने, दाँत कमजोर हुने र समयअगावै दाँत झर्ने समस्या हुनसक्छ । त्यसैले, दाँत तथा मुखलाई स्वस्थ राख्नु पर्ने स्वास्थ्य तथा जनसङ्ख्या मन्त्रालयले सुझाएको छ ।

दाँत तथा मुख सफा गर्ने तरिकाः

– बिहान र बेलुका खाना खाएपछि फ्लोराइडयुक्त दन्त मन्जन प्रयोग गरी दाँत माझ्ने
– अन्य समयमा खानेकुरा खानासाथ मुख कुल्ला गर्ने
– २ दाँत बिचको सतह ‘डेन्टल फ्लस’ को प्रयोग गरी सफा गर्ने
– टाँसिने, प्रशोधित, गुलियो, धेरै तातो वा चिसो, अमिलो खाद्य पदार्थ नखाने
– धूम्रपान, मदिरा, सुर्तीजन्य पदार्थ, पान, सुपारी सेवन नगर्ने
– रेसादार, ताजा फलफूल, हरियो सागपात, दूध, माछा जस्ता सन्तुलित खानाको प्रयोग गर्ने
– बालबालिका २ वर्ष नपुग्दासम्म सफा कपास पानीले र २ वर्षको उमेरदेखि नरम ब्रसले दाँत सफा गरिदिने
– हरेक ६ महिनामा दन्त परीक्षण गराउने

बिहान खाना खाइसकेपछि र बेलुका सुत्नुअघि नियमित रुपमा मुख सफा गरेमा करिब ९० प्रतिशत मुखका रोगहरूबाट बच्न सकिन्छ ।