सुतेर उठ्दा वा दिउसोको समयमा आँखाको कुनमा सेतो वा पहेँलो रंगको पदार्थ बसिरहेको हुन्छ । आँखाको कुनामा बस्ने उक्त पदार्थलाई कचेरा भन्ने गरिन्छ । आँखाबाट निस्केको आँशु, धुलो, फोहर र आँखाको ढकनीका मरेका कोषहरू मिलेर कचेरा बनेको हुन्छ र आँखामा बस्ने गर्छ ।
प्लीका सेमी लुनारिस नामक आँखाको भागले हरेक समय कचेरा बनाउने तरल पदार्थ निकाल्ने काम गरिरहेको हुन्छ । तर, आँखा झिमझिम गर्दा आँखामा कचेरा जम्मा हुन नपाउने हुँदा उक्त कचेरालाई आँसुले पखाल्ने काम पनि संगै भइरहेको हुन्छ । आँखाले झिमझिम गरिरहने भएकोले थोरै मात्रामा तरल पदार्थ आँखाको कुनामा जम्मा भएको आँखाका विशेषज्ञहरूले बताउँदै आएका छन् ।
आँखामा कचेरा बनिरहेको कुरालाई अधिकांश मानिसहरूले ध्यान दिने गर्दैनन् । तर, सुतेको बेला वा आँखा झिमझिम कम मात्रामा भएको बेलामा आँखाको तरल पदार्थ आँखाको कुनामा जम्मा भएर जम्छ र वातावरणको धुलो, फोहर र आँखाभित्रको मरेको कोष मिलेर ठोस पदार्थ बनाइ कचेरा बन्ने गर्छ ।
हरेक व्यक्तिहरुमा प्लीका सेमीलुनारीसले फरकफरक मात्रामा तरल पदार्थको उत्पन्न गराउने हुँदा कसेराको मात्रा पनि व्यक्तिपिच्छे फरक हुने हुन्छ । आँखामा काजल लगाएको बेलामा पनि आँखाले धेरै मात्रामा तरल पदार्थ उत्पन्न गर्ने हुँदा काजल लगाएको बेलामा पनि धेरै मात्रामा काजलसँग मिसिएर कालो रंगको कचेरा आउने गर्छ ।
जथभावी छोएको हातले वा फोहोर हातले आँखाको कचेरालाई निकाल्नु हुँदैन । यसो गरेमा आँखामा संक्रमण भइ आँखामा विभिन्न रोग लाग्न सक्छ । त्यसैले बिहान उठेपछि मुख धुने बेलामा आँखामा चिसोपानीले सफा गर्नुपर्छ ।
