सुनसरीमा व्यावसायिक केराखेती गर्ने किसानको सङ्ख्या बढेकाे छ ।
सुनसरीको इनरुवालगायतका विभिन्न स्थानमा बढ्दो प्रतिफलका कारण किसान व्यावसायिक केराखेतीमा लागेका हुन् ।
सुनसरीमा केही वर्षयता व्यावसायिक केराखेती फस्टाइरहेको कृषि ज्ञान केन्द्र सुनसरीले जनाएको छ ।
केराखेती अन्य खेतीभन्दा सजिलो र विषादीको प्रयोग पनि त्यति धेरै गर्नु नपर्ने कृषि ज्ञान केन्द्रका सूचना अधिकारी योगेन्द्र यादवले बताए ।
उनका अनुसार अहिले सुनसरीका एक हजार एक सयभन्दा बढी किसानले ६ सय हेक्टर क्षेत्रफलमा केराखेती गर्दै आएका छन् ।
इनरुवाका किसानले सुरु गरेको व्यावसायिक केराखेतीको दैनिक कारोबार तीन लाख रुपियाँभन्दा बढी हुने गरेको बताइएको छ ।
सुनसरीको इनरुवा नगरपालिका–९ बबियामा ५० जनाभन्दा बढी किसानले केराको व्यावसायिक खेती थालेका छन् ।
अन्य खेतीबाट भन्दा केराखेतीबाट तीन गुणा बढी फाइदा हुने भएकोले यहाँका किसानहरू केराखेतीतर्फ आकर्षित भएको बबिया केरा पकेट सञ्चालक समितिका अध्यक्ष हरि मेहताले बताए ।
जिल्लामा केराखेती १७ वर्ष अगाडिदेखि गर्न थालिए पनि व्यावसायिक केराखेती भने १० वर्ष अघिदेखि थालिएको किसानको भनाइ छ ।
करिब ६ सय हेक्टर क्षेत्रफलमा केरा खेती हुँदै आएको र केरा पकेट तथा ब्लक कार्यक्रम सञ्चालन भएकाले थप केराको व्यावसायिक खेतीमा लाग्ने किसान बढेका छन् ।
यहाँ केराखेतीबाट वार्षिक करौडोको कारोबार भइरहेको छ ।
केराखेती गर्ने किसानले पाँच कठ्ठादेखि बढीमा १० बिगाहासम्म केराखेती गर्ने गरेका छन् ।
होटल तथा रेस्टुरेन्टहरूमा विभिन्न परिकार बनाएर बन्ने भएपछि केराको माग बढ्न थालेको किसानहरूको भनाइ छ ।
जिल्लाको इनरुवा, भोक्राहा नरसिंह, हरिनगर, गढी, देवानगञ्ज गाउँपालिकाका किसान व्यावसायिक केराखेतीतर्फ आकर्षित भएका केरा किसान जसलाल यादवले बताए ।
एकदशकदेखि व्यावसायिक केराखेती गर्दै आएका इनरुवा–९ का किसान राजेश मेहताले पाँच विघामा उन्नत जातको केरामात्र लगाउने गरेको बताए ।
प्रतिबिघा क्षेत्रफलमा केराखेती गर्दा एक लाखभन्दा बढी आम्दानी हुने गरेको उनको भनाइ छ ।
यो पनि:
विराटनगरमा ५० करोडको लगानी गर्ने लक्ष्यसहित कृषि फर्म, पाँच हजार लिटर दूध उत्पादन गर्ने लक्ष्य
