पूर्व-पश्चिम राजमार्गको प्रयोग गरेर कतै आवत-जावत गर्दै हुनुहुन्छ भने मोरङको चिसाङ–भाउन्ने सडक किनारतिर खुला पसल देख्नुहुन्छ । राजमार्गको दुवैतर्फ घना जङ्गल छ । सो स्थानमा खुला पसलमा स्थानीय उत्पादनहरू किनबेच गर्दै गरेको दृश्य देख्न सकिन्छ ।
त्यहाँ ३० भन्दा बढी ब्यापारी सडक किनारमा मौसमअनुसारको ब्यापार गरिरहेका छन् । मोरङको भाउन्ने र चिसाङ खोला पूर्व र पश्चिममा केरा र मकैको ब्यावसायिक खेती हुने गरेको छ । सो खेतीबाट किनेर ल्याएको मकै सडक किनारमा पोलेर बेचिरहेका हुन्छन् व्यापारीहरू । मकैमात्र होइन, केरा, निगुरो, तरुल र मौसमी तरकारी पनि त्यहाँको ब्राण्ड बनिसकेको छ ।
राजमार्गमा बेलबारी–१० का मेघराज बस्नेतले पसल गरिरहेका छन् । बन्दाबन्दीले गाउँमा सञ्चालन गरेको चियापसल बन्द भएपछि उनी चिसाङ–भाउन्ने सडक किनारमा तरकारी पसल सुरु गरेका हुन् । टाउको लुकाउने साधारण घर र अलिकति पाखोबारी मात्र भएका बस्नेतले त्यहाँ ब्यापार थालेको अब चैतमा दुई वर्ष लाग्छ ।
२१ महिना भयो, मेघराजले ब्यावसाय थालेको , त्यसयता कहिलै खालि हात घर फर्केको उनलाई सम्झना छैन ।
५१ वर्षीय मेघराजको परिवारमा श्रीमतीसहित चार छोरी र एक छोरा छन् । सडक व्यापारमा परिवारका सबै सदस्यको उत्तिकै सहभागिता छ । मेघराजले भने, ‘कहिले म आउँछु, कहिले श्रीमती । हरिया मकै ठेक्का गर्न गाउँ पनि पस्नपर्यो ।’
उनले दैनिक खर्च कटाएर एक हजारदेखि १२ सय रुपैयाँ कमाइ भइरहेको बताए । अहिले मेघराज बस्नेत मात्र होइन । उनीजस्ता ३० भन्दा बढी ब्यापारी सडक किनारमा मौसमअनुसारको ब्यापार गरिरहेका छन् ।
