पित्तथैलीको पत्थरी हुने सम्भावना पुरुषमा भन्दा धेरै महिलामा हुने गरेकाे पाइएकाे छ ।
बच्चादेखि वृद्ध सबै उमेरका मानिसलाई हुन सक्ने भएपनि पित्तथैलीको पत्थरी महिलामा बढी हुने गरेकाे चिकित्सक बताउँछन् ।
विशेषतः प्रजनन उमेर समूहका महिलामा पित्तथैलीको पत्थरी हुने सम्भावना बढी हुन्छ । त्यस्तै, धेरैपटक गर्भवती भएकी महिला, गर्भ निरोधक साधन प्रयोग गर्ने महिला, बच्चा धेरै जन्माएका महिलालाई पनि पित्तथैलीमा पत्थरी हुने सम्भावना अधिक हुने गरेकाे पाइएकाे छ ।
४० वर्ष उमेर कटेका, मोटोपनाको समस्या भएका, चिल्लो तथा बोसोयुक्त खाना बढी खाने मानिसमा पित्तथैलीको पत्थरी हुने गर्छ ।
त्यसबाहेक कोलेस्ट्रोल बढी भएका, रगतसम्बन्धी समस्या भएका, खानपानका कारण, छोटो समयमा धेरै तौल घटाउने र धेरै समय व्रत बस्ने, कलेजोको रोग लागेका तथा प्यान्क्रियाटाइटिस सम्बन्धी रोगमा चलाइने औषधिका कारण पनि पित्तथैलीको पत्थरीको हुने सम्भावना धेरै हुन्छ ।
वंशानुगत कारणले पनि हुने याे राेग महिलामा एस्ट्राेजन हर्माेनका कारण बढी हुने गरेकाे चिकित्सक बताउँछन् ।
सामान्यतया बिरामीमा लक्षण नदेखिने भएकाले मानिसले बेवास्ता गर्ने गरेका छन् । पेट, दाहिने काेखा र माथिल्लाे पेट दुख्नु पित्तथैलीकाे पत्थरीकाे सुरूवाती सङ्केत हाे । पेट ढुस्स हुने, अपच भएर डकार आउनुले भने शरीरमा जटिलता बुझाउने गर्छ ।
पत्थरीका कारण गम्भीर समस्या निम्तिन सक्ने भएकाले समयमै यसकाे उपचार गराउनु बुद्धमानी हुने चिकित्सक सल्लाह दिन्छन् । यसका लागि दूरबिन प्रविधिले अप्रेसन गरी पित्तथैली निकाल्ने गरिन्छ ।
